Mest ætlar at byggja nýggja turrdokk á Skála

Hóskvøldið skal Runavíkar býráð viðgera eina umsókn frá skipasmiðjuni Mest um loyvi at sleppa at byggja nýggja turrdokk á Skála. 

Samstundis skal býráðið eisini viðgera eina broyting í býarplanini fyri økið við skipasmiðjuna hjá Mest á Skála. 

Harvið tykist greitt, at Mest hevur slept ætlanini um at byggja eina turrdokk á Tjørnunesi, innanfyri bygdina Undir Gøtueiði á eystara armi á Skálafjørðinum, sum hoyrir til Eysturkommunu, og ætlar nú at byggja nýggju, og størru, turrdokkina á Skála, sum hoyrir til Runavíkar kommunu.

Ætlan frá 2017

Ætlanin hjá Mest um at byggja út á Skálafjørðinum stavar frá februar 2017, tá tað kom undan kavi, at Mest ætlaði at inniloka verandi turrdokk á Skála. 

Mouritz Mohr, stjóri í Mest, segði tá, at innilokanin var neyðugt, fyri at gera arbeiðsumstøðurnar betri, og fyri at halda vindi og veðrið úti. 

skála skipasmiðja

Innilokanin kravdi eina broytingar í býarplanini og byggisamtyktini, tí talan skuldi vera um ein bygning, sum bleiv 50 metrar høgur.

Sostatt skuldi innilokaða turrdokkin gerast hægsti bygningur í landinum.

Skipasmiðjan MEST Skála

Møttu mótstøðu

Mótstøðan móti høga bygninginum mitt í bygdini byrjað beinavegin at merkjast á Skála. 

Innilokaða turrdokkin var høvuðssøgan í Degi og viku 23. mai 2017, tá skipað varð fyri einum borgarafundi. 

Endin varð, at ætlanin um at inniloka verandi turrdokk á Skála skipasmiðju varð slept, og ætlanin um at byggja eina nýggja, størri turrdokk hinumegin fjørðin, á Tjørnunesi innan fyri bygdina Undir Gøtueiði, byrjaði at spøkja. 

Tjørnunes - Mynd: Pól Sundskarð

Ætlanin var, at fyritøkurnar MEST, Varðin og Varðin Pelagic skuldu fara í samstarv við Eysturkommunu um at byggja turrdokkina, sum skuldi vera so stór, at sjálvt Norrøna skuldi passa inn í hana.

Mouritz Mohr, stjóri í Mest, greiddi frá ætlanini at byggja eina turrdokk á Tjørnunesi í útvarpstíðindunum 14. september í fjør:

Turrdokkin flytur kommunu

Men sambært fundarskránni til næsta býráðsfund hjá Runavíkar kommunu, sum verður hóskvøldið 4. november, so er líkt til, at staðsetingin av nýggju turrdokkini hjá Mest verður flutt yvir um aftur fjørðin til Skálar, og harvið aftur til Runavíkar kommunu.

Á skránni standa hesi mál:

3/21: Mest søkir um byggiloyvi til nýggja turrdokk á Skála. 

112/21: Broyting av býarplani við Mest á Skála

Kringvarp Føroya hevur verið í sambandi við Mouritz Mohr, stjóra í Mest, og biðið um eina viðmerking, men hann tykist onga viðmerking at hava í løtuni.