Varðhaldsfongslaður í tríggjar dagar

Ein maður er varðhaldsfongslaður í tríggjar ferðir 24 tímar, ákærdur fyri at fremja harðskap móti einum løgreglumanni, sum ikki var til arbeiðis.

Tað hevur Føroya rættur avgjørt í morgun, tá maðurin var í grundlógaravhoyring í rættinum. Hendingin fór fram tíðliga leygarmorgunin í býnum í Havn.

Ikki samband við líknandi mál

Føroya rættur valdi at varðhaldsfongsla ákærda mannin í tríggjar ferðir 24 tímar, meðan løgreglan kannar málið og ger avhoyringar.

Varðhaldsfongslaði maðurin skal vera farin til løgreglumannin og framt harðskap móti honum.

Sambært vaktleiðaranum á løgreglustøðini hevur málið ikki samband við onnur líknandi mál, sum hava verið síðstu tíðina.