- Tíðindi, mentan og ítróttur
Gevast at kanna skottilburðin í Miðvági
Statsadvokaturin í Keypmannahavn hevur gjørt av at steðga kanningini, sum løgreglan í Keymannahavn gjørdi, tí ein løgreglumaður í Føroyum skeyt ein mann í Miðvági 9.desember í fjør.
Kanningin er hildin uppat, tí niðurstøðan hjá statsadvokatinum er, at løgreglumaðurin skeyt í sjálvverju, ella fyri at verja starvsfelagar hjá sær.
Avgerðin hjá statsadvokatinum er ikki kærd til ríkisadvokatin.
Maðurin, sum løgreglan skeyt, tí hann skeyt ein løgreglumann í høvdið við høglbyrsu, er framvegis varðhaldsfongslaður í Danmark.
Maðurin, sum er miðskeiðis í trítatiárunum, er skuldsettur fyri drápsroynd og serliga grovan harðskap móti tænastumanni, sum var til arbeiðis.
Trý skot
Trý skot raktu mannin, tá løgreglan skeyt eftir honum.
Hann varð fluttur á Ríkissjúkrahúsið í Keypmannahavn til viðgerðar.
Løgreglumaðurin, sum varð raktur, var í hjálmi. Hann fekk ikki nevniverdan skaða.
Skuldsetti maðurin noktar seg sekan. Hann sigur seg einki minnast um hendingina í Miðvági 9.desember í fjør.