- Tíðindi, mentan og ítróttur
Samuel Chukwudi: Tað er gott at vera í HB
Samuel Chukwudi duldi ikki fyri, at alt ikki eydnaðist so væl, sum teir á HB-liðnum høvdu ætlað, í grannauppgerðini ímóti B36 í dag.
Kortini eydnaðist at vinna dystin og fylgja við Víkingi í oddastríðnum í Betrideildini.
- Vit spæla ikki so væl í dag. Teir hava bóltin nógv, og vit liggja og verja, segði miðverjin eftir dystin.
- Vit høvdu ymiskt, sum vit skuldu gera, sum ikki eydnaðist alt ov væl, men tað bilar ikki, vit vunnu dystin.
Leivur Guttesen var hetjan
Jacob Johansson skeyt HB framum, tá bert fimm minuttir vóru spældir, men í seinna hálvleiki javnaði Mattias Hellisdal fyri B36.
Teir hvítu og svørtu trýstu fyri at avgera, og hildu seg vera snýttar, tá Bjarki Nielsen fekk gult fyri at kasta seg ístaðin fyri at fáa fríspark ella brotsspark.
Tá átta minuttir vóru eftir, skeyt Leivur Guttesen sigursmálið fyri HB, sum hevur vunnið sjey av átta dystum í landskappingini.
- Tað vóru nokk ikki nógv, sum høvdu væntað, at vit fóru at vera so langt frammi eftir átta dystum, so vit eru ordiliga væl nøgdir, og spælararnir í hópinum eru ordiliga væl nøgdir við venjaran, segði Samuel Chukwudi.
- Tað er ein ordiliga góð kensla at vera í HB.