Sjóndepilin við Íslandsvegin í Havn varð settur á stovn í 1988. Tey fyrstu mongu árini var navnið Føroya Blindastovnur. Men fyri umleið 10 árum síðani varð navnið broytt til Sjóndepiliin. Karin Kass, leiðari, sigur, at tey merktu beinanvegin eina broyting, tí Sjóndepilin er eitt meira jaligt heiti. Tey merktu týðiligt, at tað bleiv lættari fyri fólk at seta seg í samband við tey.

Sjóndepilin er skipaður í tríggjar eindir. Tær eru ráðgevingin, dagtilhaldið og vardi verkstaðurin í Traðarbrekku. Á Sjóndeplinum kunnu blind og sjónveik fáa alla ta hjálp, ið tey hava brúk fyri.

Í dagtilhaldinum við Íslandsvegin veva tey, binda, pussa horn og ymiskt annað. Tey siga, at tað er sera umráðandi at merkja, at ein kann gera okkurt til nyttu, hóast ein er sjónveikur ella blindur. Kvinnurnar í ítrivinum siga, at tað kennist sum hetta er ein familja sum samlast her.

Vardi verkstaðurin á Traðarvegnum er eitt arbeiðstilboð til sjónveik/blind og lættari seinment. Har eru fimm fólk til arbeiðis, umframt starvsfólk. Tá vit vitja, ger Hans Birgisheim goggar, sum verða seldir umborð á útróðrarbátar. Diana á Horn, deildarleiðari, sigur, at tey hvønn mánað vitja onkra fyritøku. Hesa vikuna fara tey út á Glasir at vitja og fáa frágreiðing um nógv umtalaða skúlan. Í Traðarbrekku er eisini handilin hjá Sjóndeplinum.

Ruth Thomsen skipar javnan fyri tiltøkum í bølamyrkri. Tað hava verið ymiskar máltíðir, kaféir og konsertir. Hon sigur, at endamálið er at fólk skulu uppliva hvussu tað er at vera blindur. Kortini fáa tey eina jaliga uppliving. Ruth sigur, at fólk eru eyðmjúk, tá ljósið verður tendrað aftur.

Hvønn týsdag samlast nakrir menn á Sjóndeplinum til upplestur og at samskifta um orð og málslig fyribrigdi. Jens Marius Henze, fyrrverandi lærari, lesir ymsar tekstir upp. Nólsoyingurin John Thomsen, sum kemur til Havnar hvønn týsdag, er nógv upptikin av serligum orðum, sum hinir so kunnu gita.

Og vit hitta eisini Johan Petur Nielsen, sum hevur verið roknskaparleiðari á Sjóndeplinum í 22 ár, hóast hann hevur lítla sjón. Stóru tølini og bókstavirnir á telduni og talan úr hátalaranum gera, at hann er førur fyri at gera sítt arbeiði. J

Tey, sum annars eru við í sendingini á Sjóndeplinum, eru: Anna Nesá, Bernhild Petersen, Emmy Johansen, Hjørdis Samuelsen, Kristina Davidsen, Olivia Kristiansdóttir, Silja Samuelsen, Karin Kass, Diana á Horn, Hans Birgisheim, Ruth Thomsen, Jens Marius Hentze, John Thomsen, Maria Svabo Hansen, Johan Petur Nielsen, Tórun Sumberg og Selma Davidsen.