- Tíðindi, mentan og ítróttur
Við Tórði á túri
Millum manna fekk hesin býlingurin úti í Grønlandi heitið Kardumummubýurin, tí júst um tað mundið býlingurin kom upp, var hoyrispælið "Fólk og dólgar í Kardamummubýnum", sum Eyðun Johannesen leikstjórnaði, sent í Útvarpinum. Danberg & Joensen, sum stykkjaði út og bygdi, gjørdi av at øll húsini skuldu vera reyð við hvítum vindeygum og grønari tekju. Soleiðis er tað framvegis.
Jógvan Amonsson, sum nú eigur barnaheimið, sigur at tað er so veðurgott í Kardumummubýnum, at tað einasta sum hendi tá ódnin var í 1988 var, at skrellistativið koppaði. Tey flestu fluttu inn fyrrapartin í sekstiárunum, og tá vóru øll stykkini planerað og klárt var at gera urtagarð. Ovara hæddin var fullkomiliga liðug. Har vóru trý kømur, køkur og stova. Seinni hava nógv innrættað kjallaran.
Í býlinginum er ein hárfríðkanarstova, Meraki. Vivian Unadóttir sigur, at fyri seg er tað praktist at hava arbeiðsplássið í kjallaranum, tí hon eigur trý børn. Hon sigur, at nógv havnarfólk vita ikki hvar Kardumummubýrurin er og tey eru bilsin tá tey koma higar. Og børn samanbera ofta býlingin við Lønneberg, har Emil býr, tí her eru húsini eisini reyð við reyðum trægarði og hvítum vindeygum.
Eigil Lyngsø, sum var kendur barberur í býnum, býr eisini í Kardumummubýnum. Tey fyrstu árini arbeiddi hann undir Sjómansheiminum í Vágsbotni og síðani hevði hann í mong ár klippistovu undir Hafnia. Hann sigur, at tað var áhugavert tá menn komu til Havnar við gomlu postbátunum. Tá komu teir at klippa sær og hann frætti nógv tíðindi úr bygdunum.
94 ára gamli Heri Mohr hevur búð í Kardumummubýnum síðani 1964 og her býr hann framvegis. Hann sigur, at her hevur verið eitt livandi og gevandi grannalag. Nú býr Heri í kjallaranum hjá dóttrini Maluni, sum saman við manninum Jógvan Dahl hevur keypt barnaheimið.
Malan Mohr sigur, at tað var trygt og gott at vera barn í Kardumummubýnum, tá hon vaks upp her. Allar mammurnar vóru heima og børnini spældu í býlinginum frá morgni til myrkurs. Nevndin, sum skipaði fyri spølunum hjá børnunum, hevði navnið KMB og tey skrivaðu gerðabók, sum framvegis er til.
Húsini hjá skemtaranum Jákupi Veyhe eru við Torfinsgøtu, men eru samstundis portrið inn til Kardumummubýin. Jákup sigur okkum søgur um abban, sum hevði sama navn og átti húsini. Hann var kemiskur sevilverkfrøðingur og gjørdi nógvar áhugaverdar royndir. Í kjallaranum her verður søgan um Mórugøtu í Barnaútvarpinum skapt.
Jóna Hvannastein og familjan eru nýggjastu íbúgvarnir í Kardumummubýnum. Hon heldur at tað er deiligt, at tað er so friðaligt, hóast tað er stutt oman í býin tá tiltøk eru í miðbýnum. Tað er eisini stutt til vøggustovu, barnagarð og skúla. Beint nú er Jóna í barnsburðarfarloyvi, Hon hevur eina dóttir sum er fimm vikur. Hinar báðar genturnar eru 3 og 7 ár.