Føroyska samferðslusøgan er søgan um íløgurnar í tey hørðu virðini, ið kanska meiri enn nakað annað, útloysa tey bleytu.
Hetta er søgan um bygdir, býir og oyggjar, ið verða knýtt saman, fyrst við postbátunum, ferðamannaskipunum og ferjunum, og harumframt vegasambondum, tunlum, byrgingum og brúm - við øllum teimum møguleikum, ið hetta hevur við sær, tað veri seg í yrkishøpi, frítíðarhøpi og á persónligum støði.
Men føroyska samferðslusøgan er eisini frásøgnin um eitt nú sjúkraflutning á sjógvi og landi, og føroyska politiið, sum fær fyrsta politibilin í 1959.
Hesuferð hoyra vit Martin Tórgarð siga frá tíðini, tá ið hann var skipari á Reyða Krossi, Tummas í Garði sigur okkum søguna um læknabátin Reyða Kross, og hvørjar ætlanir hann hevur við bátinum nú. Eisini hitta vit Jens Jacobsen, sum varð settur í starv sum portørur á Klaksvíkar Sjúkrahúsi í 1959, og fyrrverandi stjórin á Suðuroyar Sjúkrahúsi, Ronnie Midjord, sigur okkum um sjúkraflutning í Suðuroy. Eisini sigur Dánjal Poulsen okkum um eina dramatiska læknaferð til Slættanes.
Og vit fara á gátt hjá Hjartvard Skálagarð, har vit eitt nú spyrja um orsøkina til at danir yvirtaka politiið í Føroyum í 1958, samstundis sum vit fregnast um fyrstu politibilarnar í Føroyum.
Tú kanst hoyra sendingina her!