Sjálvt um hon livdi fyri 300 árum síðan, so kenna vit øll søguna um Beintu, og um tú spyrt Magna Laksáfoss, sum saman við mammuni Lydiu Laksáfoss gevur út bók um hesa megnarkvinnu, so er orsøkin til at Beinta enn er kend hon, at Beinta er tað tættasta vit koma einum royalum føroyingi. Men mangt av tí vit vita stavar úr skaldskapi, og er kanska tí ikki heilt satt.

Lydia Laksáfoss hevur altíð havt stóran áhuga fyri søguni og hevur í mong ár savnað saman søguligt tilfar, sum nú er skrivað niður í tað, sum verður fyrra bind av tveimum um Beintu.

– Vit eru ættað úr Miðvági, og tí hava søgur um Beintu altíð verið til í okkara familju, men tað vit kendu vóru bert brot úr søguni, og tá mamma hevði savnað saman so nógv tilfar um hana, so settu vit okkum fyri at fáa hetta skrivað niður og sett saman.

Úrslitið fyri fyrst er ein bók á 168 síður, sum Erling Laksáfoss hevur myndprýtt, sum sigur frá fyrra partinum av lívinum hjá Beintu.

Nógv gransking hevur verið gjørd fyri at fáa hesar myndir at vera so samtíðarhóskandi sum gjørligt, og sjálvt um fáar ella ongar beinleiðis søguligar tilsipingar eru til útsjóndina hjá Beintu og familju hennara, so skínur persónleiki teirra ígjøgnum tær søguligu frágreiðingar sum finnast, og hesar liggja so til grund fyri myndirnar.