Til ber ikki til at basa listeriu heilt

Heilsufrøðiliga Starvsstovan hevur eftirlit við matvøruframleiðsluni í Føroyum. Finna tey listeriubakteriu á einum matvøruvirki, áleggja tey virkinum at fáa hetta í rættlag sum skjótast. Um tað skuldi borið á, at matur fongdur við listeriu er farin út í handlarnar og harvið til brúkararnar, lýsir HFS alment við hesum á heimasíðuni, umframt at tey fáa boðini út í miðlarnar. Boðini snúgva seg sum oftast um, at maturin antin skal burturbeinast ella latast aftur til handilin, har hann varð keyptur. Ásannandi, at tað er sera trupult heilt at sleppa undan listeriubakteriu í matvørum, hevur ES ásett reglur um, at markvirði skal setast á, hvussu nógv listeriubakteria kann vera í matvørum, soleiðis at hon ikki kann vaksa seg til nøgdir, sum kunnu elva til sjúku hjá fólki. Hesum reglum fylgir Heilsufrøðiliga Starvsstovan, tá hon kannar fyri listeriu. Hoyr longri prát við HFS um, hvussu teirra arbeiðsháttur er. Vikuskiftissendingin var á gátt hjá HFS og prátaði við Maluna Nicolinudóttir Mikkelsen, deildarleiðara í matvørudeildini, Bjørg Mikkelsen, sum arbeiðir við yvirvøku av matvørum og Jógvan Páll Fjalsbak, deildarleiðara av mikrobiologisku deildini hjá HFS. Innslagið er longra útgávan í mun til tað, sum varð sent í útvarpinum.