Vit tosa ikki um løn

Cecilia Nolsøe Sørensen helt fyri nøkrum árum síðan vera ein trupulleika, at vit ikki tosa hart um okkara privatu fíggjarviðurskifti, so hon gjørdi ein dulnevndan vanga á Instagram, sum hon kallaði fíggjarligt frælsi. Á hesum vanga deildi hon ymisk fíggjarlig viðurskifti og ivamál, og eftir stuttari tíð hevði hon nógvar fylgjarar.

- Har vóru sera nógv fólk, sum skrivaðu privat til mín og spurdu, hvussu tey praktiskt skuldu fara til verka, sigur Cecilia, men leggur afturat, at sera fá viðmerktu uppsløgini alment.

Ein, hvørs løn er meira almenn enn hjá teimum flestu, er Mary Antonsdóttir, forkvinna í Heilsuhjálparafelag Føroya. Á hvørjum aðalfundi er lønin hjá forkvinnuni til umrøðu, og sjálvt um tað er neyðugt, so er tað ikki so unniligt.

- Tá tað punktið kemur á skrá, havi eg hug til at fara undir borðið, tí tað er so flóvisligt at sita har og vera máld hvussu nógv eg eri verd í krónum og oyrum. Men um vit tosaðu opið um hesi viðurskifti, so hevði eg ikki havt trongd til at goyma meg, sigur Mary.

Sum samfelag høvdu vit heilt víst fingið nakað burturúr, um gjøgnumskygnið var í lønarlagnum, heldur Mary, tí tá høvdu vit sæð lønarmunirnar, og kundu spurt um hví.

Eisini hevði tað verið lættari at samráðst um løn, um vit øll vistu av hvørjum øðrum, legur Mary afturat