Vil hava harðari lóg um eftirgjørda sól

Heilsustýrið biður Heilsu- og Orkumálaráðið dagføra lógina um solarium til kosmetiskt endamál.

Hon er frá 2015. Tá kom eisini 18 ára aldursmarkið.

Men lógin er bara fyri almennar veitarar.

Hon hevur tí ikki nøktandi verjandi virknað, sigur Heilsustýrið. 

Solariumnýtsla er væl skjalprógvað at vera krabbameinselvandi og serliga vandamikil fyri børn og ung.

Treytir

Heilsustýrið mælir tí til, at lógin verður víðkað til allar veitarar.

Og at greið regulering, skráseting og greitt eftirlit koma.

Í nøkrum londum er forboð sett fyri at brúka sóllampur, solarium.

Heilsustýrið vil hava forboð fyri at marknaðarføra og lýsa við solarium sum heilsufremjandi.

Og aðrar treytir skulu eisini koma í lógina, eitt nú um brúkaravegleiðing, verndarútgerð, ávaringarskelti, markvirði og loyvi at virka.