Eysturoyartunnilin verður 11 kilometrar langur og saman við Sandoyartunnlinum kostar verkætlanin tilsamans 2,6 milliardir krónur.

93 ára gamli Jákup Mikael Mikkelsen á Toftum sigur, at tá hann var smádrongur var eingin brúgv á Toftum, og tí varð róð umborð á postbátin. Fyrsta brúgvin varð gjørd í 1928. Jákup Mikael sigur, at øll tey fyrstu árini hann minnist fór postbáturin til nógvar bygdir eftir at hann hevði verið á Toftum. Hann fór til Glyvrar, Søldarfjarðar, Skála, Strendur, Selatrað, Oyrar, Hvalvíkar, Hósvíkar, Kollafjarðar, Kaldbaks og síðani til Havnar. Tað tók tað mesta av einum degi at fara til Havnar tá. Tá Eysturoyartunnilin er liðugur verða tað bara nakrir fáir minuttir at koyra til Havnar.

Sigurd Lamhauge, verkfrøðingur, er ein av teimum í byggileiðlsuni hjá NCC, sum ger Eysturoyartunnilin. Við honum fara vit ein túr í Eysturoyartunnilin av Hvítanesi.  Fyri at geva eitt dømi um støddina á Eysturoyartunnlinum, sigur Sigurd, at vanligir lastbilar skulu gera 150.000 túrar við gróti úr tunnlinum.

Norðmaðurin Karl Kristian Ødegården byrjaði sum lærlingur í Norðoyatunlinum og nú borar hann Eysturoyartunnilin. Vit vitja hann í stýrhúsinum á stóru borimaskinuni.

Ein annar norðmaður, Reidar Trengereid, fyllir 60 ár í dag, og hann rokast av lívsins kreftum við at løða. Hann hevur ikki talið á, hvussu nógvum tunnlum hann hevur arbeitt í, men heldur at tað man vera umleið hálvthundrað.

Áðrenn farið verður oman í tunnilin á Hvítanesi, má trygdarútgerð fáast frá Høgna Joensen, sum er trygdarleiðari hjá NCC.

Sigtór Petersen frá byggifelagnum J&K Petersen, sum ger vegirnar uttan um Eysturoyartunnilin, greiðir frá vegagerðini. Hann sigur, at bæði á Hvítanesi, á Strondum og í Rókini í Saltnesi verður rundkoyring gjørd úti í sjónum.

Teitur Samuelsen, stjóri í Pf. Eystur- og Sandoyartunnlar, sigur, at alt hevur gingið sum ætlað og boriarbeiðið í tunnlinum verður liðugt fyrrapartin komandi ár og tá verður farið at bora Sandoyartunnilin.

Á Strondum vísir Kristian Stórhamar, tekniskur leiðari fyri verkætlanina hjá NCC, okkum niður í tunnilin og ikki minst ta nógv umtalaðu rundkoyringina.

Hann sigur, at Eysturoyartunnilin er ikki bara ein stór verkætlan í Føroyum. Verkætlanin Eysturoyartunnilin og Sandoyartunnilin er størsti tunnilssáttmáli, sum NCC nakrantíð hevur gjørt, og rundkoyringin í Eysturoyartunnlinum er størri enn tær í Noregi.

Dia Lamhauge er ein av verkfrøðingunum hjá Landsbyggifelagnum, sum hava eftirlit við arbeiðnum fyri tunnilsfelagið. Hann er uppvaksin í Saltangará, men býr nú í Norðragøtu. Hann er vísur í, at allar Føroyar vinna við einum Eysturoyartunnli.

Josefina Strømsten er mamman í íbúðarbarakkunum, sum standa á gamla hondbóltsvøllinum á Strondum. Har eru m.a. 24 kømur og stórur og væl útgjørdur køkur og hugnalig matstova.

Otto Dam Vang úr Leirvík koyrir dumpara og ger ymisk onnur arbeiði í tunnlinum. Honum dámar arbeiðið sera væl. Otto sigur, at vaktin er 12 tímar og teir arbeiða í 12 dagar og hava so frí í níggju dagar. 

Glyvramaðurin Janus Vang hevur viðlíkahildið borivongin sum mekanikari, men nú er hann komin upp í húsið í borivogninum og borar og stýrir boringini á sínari vakt. Hetta heldur hann vera spennandi arbeiði. Landmátarin hevur gjørt kortið, sum er í telduni í borivogninum og sigur, hvar borast skal. Janus heldur, at tá hugt verður eftir ferðslumynstrinum, er tað rætt at gera undirsjóvartunnil millum Skálafjørðin og Havnina.

Jóannes Joensen koyrir eina stóra gummiged og lessar grót upp í dumpararnar. Hann hevur arbeitt í tunnli í tilsamans 28 ár, 18 ár hjá NCC og frammanundan arbeiddi hann 10 ár hjá Landsverki.

Í sendingini verður tosað við hesi fólk í sendingini:

Jákup Mikael Mikkelsen
Sigurd Lamhauge
Høgni Joensen
Karl Kristian Ødegården
Reidar Trengereid
Sigtór Petersen
Teitur Samuelsen
Kristian Stórhamar
Dia Lamhauge
Josefina Strømsten

Otto Dam Vang
Janus Vang
Jóannes Joensen