Í einum mannalívi eru summir dagar øðrvísi enn aðrir, eitt nú føðingardagur, dópsdagur og brúdleypsdagur. Vit hátíðarhalda, tá vit fáa prógv ella hava arbeitt eitt ávíst áramál á einum arbeiðsplássi. Vit hava ymiskar halgisiðir í trúarlívinum, halda jól, páskir, og hvítusunnu. Og soleiðis dettur dagur ikki bert av degi. Men veitsludagarnir løða okkum aftur og vísa okkum allar litirnar í gerandisdegnum, sum vit kanska ikki eru var við. Føstan er skiftið til páskirnar, tá deyðin doyr, og lívið livir, og alt er gróður, grønt og gult - lívið hevur sigrað.