- Tíðindi, mentan og ítróttur
Frá fyrsta Smirli til í dag
Í 1960-árunum verður føroyska samferðslukervið munandi útbygt, og í hesari fyrstu sendingini um sekstiárini, sigur Jógvan Ravnsfjall, søgukønur, okkum søguna um ferðamannaskipið Pride, ið J. F. Kjølbro lat byggja í 1961, og vit hitta eisini kvívíkingin, Sofus Jacobsen, sum í nøkur ár var skipari á Pride.
Í 1963 letur Hvalbiartunnilin, ið er fyrsti tunnilin í Føroyum, upp fyri almennari ferðslu. Vit hitta Sniálv Røvilsberg, ið sigur okkum søguna um útróðrarbátin Jóhanna, ið eisini varð brúktur til sjúkraflutning millum Hvalba og Tvøroyri, fyri Hvalbiartunnilin lat upp.
Vit spyrja Jógvan í Lon Jacobsen, professara í málfrøði, um tey ymisku orðini, ið hava verið brúkt fyri tunlar. Eisini fáa vit ein samandrátt av einari reportagu, sum Lias í Rættará gjørdi, meðan Hvalbiartunnilin stóð í gerð.
Í 1961 verður farið undir Hvalbiartunnilin, sum verður tikin í nýtslu í 1963.
Jens Hákun Leo er útbúgvin stjórnmálafrøðingur og hevur harumframt lisið løgfrøði og hevur hjánám í søgu frá Fróðskaparsetri Føroya. Eisini hevur hann latið úr hondum bókina Alt ger mun. Eitt stutt brot úr Hvalbiar søgu. Vit hitta Jens Leo, sum vit eitt nú spyrja hví Hvvalbiartunnilin gjørdist hin fyrsti í Føroyum.
Eisini hitta vit Rudolf Joensen, sum sigur frá einum forkunnugum busstúri í Mercedes Benz O319 bussinum hjá Hans Erik Mortensen frá Tvøroyri til Hvalbiar, tá ið Hvalbiartunnilin var nýggjur.
Tú kanst hoyra sendingina her!