- Eg havi verið okkurt øgiliga leingi, og eg hugsaði, at skal eg gera okkurt annað, so er tað nú. So kann eg vónandi nokk so leingi eisini vera tað.

Helgi Rasmussen er kendur sum organisatiónssálarfrøðingur, og hann hevur áður givið út bókina Finn teg í organisatiónini, sum er útkomin bæði í Føroyum og Danmark.

Nú hann er vorðin 60 ár í summar, debuterar hann við sínum fyrsta yrkingasavni, ið stutt og greitt nevnist - eitt.

Tað er freistandi at halda, at Helgi brúkar sálarfrøðina sum grundarlag, tí savnið minnir um tankameldur, har ein tanki tekur ein heilt annan við sær.

Savnið er so sermerkt, at Sprotin, sum gevur út, hevur lagt eina lesivegleiðing út á heimasíðuna. Vegleiðingin er: Dvøl við linjurnar og tak einstakar uppaftur, áðrenn tú heldur fram. Gert tú tað, fært tú eitt vaggandi stev í upplesturin, sum minnir um føroyskan dans.

Samstundis er savnið komið út sum ljóðbók, har Martin Joensen lesur og hevur lagt annað ljóð við.

Hoyr áhugaverdu samrøðuna við Helga Rasmussen.