- Mann skal tíma tað væl og hava nógva orku.

Soleiðis sigur Marjun Hanusardóttir, tá hon verður spurd, hvørji góð ráð hon hevur til persónin, sum skal koma í hennara stað á løgmansskrivstovuni. Tí 1. august í ár gevst hon formliga sum løgmansstjóri. Tá hevur hon verið løgmansstjóri hjá seks løgmonnum.

Sambært Marjuni Hanusardóttir er hetta eitt starv, sum hevur fylt sera nógv.

- Hetta er á ongan hátt eitt átta til fýra arbeiði, tí er okkurt mál, sum er umráðandi at fáa avgreitt her og nú, ja so mást tú til arbeiðis. Líka mikið hvør dagur í árinum talan er um, sigur Marjun Hanusardóttir.

- Tá tú situr við einum máli, so veitst tú ikki altíð í løtuni, hvussu málið kann útvikla seg. Men tíbetur havi eg góð evni at blaða um og fara víðari, sigur Marjun Hanusardóttir og vísir á mál, sum hon minnist serliga væl frá teimum 25 árunum á løgmansskrivstovuni.

- Tað hava verið fleiri stór mál. Eitt nú bankamálið, fullveldismálið, Visjón 2015, ES boykottið, skálafjarðartunnilin og so framvegis. Ikki øll hava verið so behagilig, sigur Marjun Hanusardóttir.

Í morgunsendingini hugdi Marjun Hanusardóttir á hesi 25 árini sum løgmansstjóri.