- Tíðindi, mentan og ítróttur
Breddin
Vit mangla kommunulæknar í Føroyum. Í løtuni eru 34 kommunulæknastørv í Føroyum, og tað talið er alt ov lítið, heldur formaðurin í Læknafelgnum, Pál Weihe.
Ein annar trupulleiki er, at tað er avbjóðandi at fáa kommunulæknar í føst størv summastaðni í landinum. Í Suðuroy eru til dømis fýra viðtalur, men skjótt er eingin fastur kommunulækni í oynni.
Og í Tórshavnar Kommunu er eisini læknamangul. Áleið 200 borgarar í Havn hava ongan kommunulækna, og javnan ringja borgarar til Heilsutrygd fyri at skifta kommunulækna av ymiskum orsøkum. Men tað ber ikki til, tí eingin viðtala tekur ímóti fleiri boragrum.
Vit viðgera trýstið á kommunulæknaskipanina saman við avvarðandi myndugleikum og síðst í innslagnum vitja Sirið Stenberg og Annika Olsen, limir í løgtingsins trivnaðarnevnd, og Kaj Leo Holm Johannesen, landsstýrismaður í heilsumálum, útvarpsstovuna.
Vika Sex
Vika Sex er farin aftur um bak, og í hesum døgum eftirmetir felagið Kyn seksualundirvísingina úti á ymsu miðnámsskúlunum í Føroyum.
Turið Hermannsdóttir og Bjørt Lind eru í nevndini í felagnum Kyn, sum tekur sær av undirvísingini í Viku sex. Tær halda, at ungdómurin hevur tikið sera væl ímóti tiltakinum. Men tey ungu vilja hava meir, og tí er tað ynskiligt, at uppaftur meira verður gjørt á økinum.
Luttakarar: Heðin Mortensen, Katrin Rubek Nielsen, Egil á Bø, Sirið Stenberg, Annika Olsen, Kaj Leo Holm Johannesen, Turið Hermansdóttir og Bjørt Lind.
Gjørt sendingina hava Arnfríð Joensen Dahl, Tróndur Olsen og Hallur av Rana.
Hallur av Rana var redaktør.