Børn, har foreldrini eru samkynd, hava ikki somu rættindi sum onnur børn. Á Breddanum í dag lýsa vit, hvønn mun lóggáva og sosialar skipanir gera á børnum, sum hava eina mammu og ein pápa - og á børnum, har bæði foreldrini eru av sama kyni. Eisini kjakast fýra løgtingsfólk um evnið, ið knappliga gjørdist sera aktuelt, tá hjúnini Annika S. Vang og Karin Jacobsen Vang søgdu sína søgu um lítla sonin - og barn nummar tvey, sum er áveg.

Luttakarar: Monika Rasmussen, fakligur stjóri á Familjufyrisitingini; Bjørt Samuelsen, tingkvinna fyri Tjóðveldi; Christian Andreasen, tingmaður fyri Fólkaflokkin;
Ingilín Strøm, tingkvinna fyri Javnaðarflokkin; Steffan Klein Poulsen, tingmaður fyri Miðflokkin. Eisini hoyra vit Anniku S. Vang greiða frá støðuni, ið hon og Karin Jacobsen Vang eru komnar í, nú teirra barn nummar tvey eru áveg.

Um eina góða viku verður aftur loyvi at skjóta lomviga, lunda, álku og skarv. Tað ørkymlar fólk á útoyggj, sum í nógv ár hava roynt, og hava gjørt sítt til, at friða fuglin. Fyrr í dag vóru vit í Dímun saman við fuglafrøðingi og formanninum í Útoyggjafelagnum.

Luttakarar: Óli Jákup úr Dímun, formaður í Útoyggjafelagnum; Sjúrður Hammer, fuglafrøðingur.

Lagt til rættis: Marjun Dalsgaard, Hallur av Rana og Jón Brian Hvidtfeldt.

Redaktørur: Jón Brian Hvidtfeldt