Ivasom um russiska tjóðartingsvalið

Tjóðartingsval er í Russlandi ídag, og til ber at velja líka til sunnudagin. Veljast skulu 450 limir í Dumuna. Flokkurin Sameint Russland stendur til at vinna valið og fær sambært veljarakanningunum meira enn 40 prosent av atkvøðunum. Kommunistaflokkurin verður væntandi næststørsti flokkur við 20 prosentum av atkvøðunum. 

Eisini í Føroyum kunnu fólk við russiskum ríkisborgaraskapi greiða atkvøðu - bæði fólk á landi og russisk sjófólk. Ein teirra, sum hevur ein virknan leiklut í sambandi við valið í Russlandi er 44 ára gamla Daria Wagner, sum er komin til Føroya úr Danmark at eygleiða um alt gongur rætt fyri seg. Hon er sannførd um, at altjóða samfelagið eigur ikki at góðkenna valúrslitið í Russlandi.