Tor var tvær ferðir í havsneyð men bjargaðist

Mannbjørn Solmunde var av tilvild staddur í Florø, tá alibáturin Tor, hjá felagnum AQS AS, varð sleipaður til Florø. 

Tor stóð á dekkinum á farmaskipinum "Eemslift Hendrika", tá skipið byrjaði at leka og fekk slagsíðu. Tað stóð á gomlum nøglum í ringa veðrinum, og tað varð væntað, at "Eemslift Hendrika" fór at koppa og søkka.

Men lukkutíð loysnaði Tor úr sínum bindingum á dekkinum á farmaskipinum og fór á sjógv, og tað verður hildið, at tað bjargaði hollendska framaskipinum. 

Í góðum standi

Nógv hildu óivað, at Tor nú var skipbrotin, men so var ikki. Alibáturin, ið er 24 metrar langur og kostaði 66 milliónir krónur at byggja, yvirlivdi hørðu viðferðina. Og klokkan eitt í nátt varð hann so sleipaður inn á Florø, har hann nú liggur. 

Mannbjørn Solmunde var av tilvild staddur í Florø og var niðri á kaini og gjørdi eina upptøku av nógv umrødda grøna bátinum, sum hann legði út á sín facebookvanga. 

– Tor er í merkisvert góðum standi, tá hugsað verður um viðferðina, ið hann hevur fingið, sigur Mannbjørn Solmunde. 

Mannbjørn var júst komin úr Egyptalandi við Thor Omega, fyri at gera klárt til nýtt arbeiði i Norðsjónum.

– Vit náddu innum og sigldu innanskers frá Stavanger til Florø, fyri at umganga hasa ódnina, ið kom. Vit hoyrdu neyðarkallið frá hollenska skipinum, sum var í havsneyð, og hava síðaní fylgt við í bjargingararbeiðinum í miðlunum. Tá vit sóu, at Tor kom til Florø, var upplagt at hyggja at honum. Hann kostar hóast alt 66 millónir krónur, greiðir Mannbjørn Solmunde frá.