- Tíðindi, mentan og ítróttur
Gongd á aftur koppsetingina í næstu viku
Tað hevur verið svikaligt við veitingunum av korona-koppsetingarevnum til Føroyar, men nú kemur gongd á aftur.
Pfizer-BioNTech hevur nevniliga boðað donsku myndugleikunum frá, at í komandi viku verða veitingin tvífaldað, og hetta fer eisini at ávirka veitingina til Føroya.
Føroyar fáa Pfizer-BioNTech
Hjalti Gunnarstein sigur, at vit helst fáa fleiri skamtar hendavegin mikudagin ella hósdagin. Vanliga hava vit bara fingið ein bakka av koppingarevni um vikuna, viðhvørt einki. Men í komandi viku fáa vit tríggjar bakkar.
Í einum bakka eru vanliga umleið 1.300 skamtar, men nú fer talið upp móti 4.000. Danmark fær skamtar frá fleiri veitarum, bæði Pfizer-BioNTech, Moderna og AstraZeneca.
Avtalað er, at Grønland fær koppingarevnið hjá Moderna, meðan føroyingar fáa fyrst og fremst koppingarevnið hjá Pfizer-BioNTech.
AstraZeneca ikki komið til Føroya
Einki er komið til landið av koppsetingarevninum frá Astra Zeneca, sum danir eisini eru steðgaðir at koppseta við fyribils, tí illgruni er um hjáárin, sum kunnu elva til blóðtøppar.
Fyri at koppsetingin hjá Pfizer-BioNTech skal fáa fullan virkanð, er neyðugt at koppseta fólk tvær ferðir.
6.641 føroyingar hava fingið fyrsta prikið, og tað svarar til 12,5 prosent av føroyingum. 4129 hava fingið næsta prikið, og tað svarar til 7,8 prosent.