Ísland sparkaði Ongland úr EM

bannari
27.06.2016 - 21:55
ÍtrótturFótbóltur
Ísland sparkaði Ongland úr EM
Ísland hevur júst syrgt fyri mesta óvæntaða úrslitinum í EM-søguni. Ísland er í fjórðingsfinaluni. Ongland er útsligið
 

Ísland, sum er minsta tjóðin, sum nakrantíð hevur luttikið í einum EM-endaspæli, hevur í kvøld syrgt fyri størsta úrslitinum í EM-søguni.

Ísland vann 2-1 á Onglandi, sum var stórfavorittur undan dystinum. Støðan í hálvleikinum var eisini 2-1 til Ísland.

Dysturin byrjaði væl fyri Ongland, tí tað vóru bara farnir fýra minuttir, tá Hannes Haldórsson gjørdi brotsspark móti Raheem Sterling.

SÍ EISINI Ups: Fagnaðu skeivum liði eftir søguligan sigur

Brotssparkið setti Wayne Rooney trygt í málið, og so var Ongland á odda 1-0, og tað líktist eina løtu, at favorittarnir fóru at vinna tryggan sigur.

Men tað gingu bara tveir minuttir, so svaraði Ísland aftur. Kári Árnason forlongdi eitt langt innkast, og síðani var Ragnar Sigurðsson klárur og skallaði bóltin í enska málið.

Tá átjan minuttir vóru farnir hendi tað næstan óveruliga. Eftir gott íslendskt uppspæl fekk Kolbeinn Sigþórsson bóltin við enska brotssteigarmarkið, hann smekkaði til, og enski málverjin, Joe Hart, kláraði ikki at bjarga.

Ísland gjørdi Ongland til eina smátjóð

Sum áskoðari væntaði ein, at Ongland fór at leggja stórt trýst á Ísland í seinna hálvleiki, men tað kom ongantíð. Íslendsku spælararnir stríddust væl, og tá teir høvdu bóltin spældu teir væl.

Um ein ikki visti tað, so hevði ein ikki hugsað um, at tað var ein hin minsta fótbóltstjóðin í Evropa, sum spældi ímóti einari av teimum allarstørstu.

Íslendsku spælararnir syrgdu fyri, at Ongland líktist einari smátjóð í altjóða fótbólti. Men nú ivast eingin í, hvat íslendska liðið megnar.

Ísland er í EM-fjórðingsfinaluni, og har skulu teir spæla ímóti vertstjóðini, Fraklandi. Dysturin verður í París sunnudagin.

Er kopiera
Nýggjastu sendingar í ÚV
Fríggjadag 23. apríl
Morgunlesturin fríggjamorgunin 23. apríl 2021
123017
Hósdag 22. apríl
RagnarRokk 22.apríl "Jorn Lande"
122921
Hósdag 22. apríl
BREDDIN
123177
Hósdag 22. apríl
Nón 22. apríl 2021
123174
Hósdag 22. apríl
Mono: Sangleikir (1:5)
123165
Nýggjastu sendingar í SV
Mánadag 19. apríl
3-2
123045
Sunnudag 18. apríl
Andakt við Beintu Áargarð
122973