- Tíðindi, mentan og ítróttur
Góðan morgun Føroyar
Fyrsta november í 1983 bleiv Kristina Christiansen sett í starv sum politinæmingur í Danmark.
Eftir lokna útbúgving, í 1986, bleiv hon fyrsti kvinnuligi politistur í Føroyum.
Eftir eina drúgva yrkisleið í fakinum hevur hon nú takkað fyri seg.
Onkrar løgnar støður hava tikið seg upp, ásannar Kristina.
Eitt nú hevur hon upplivað, at fólk hava ringt á støðina. Tá hon hevur tikið telefonina, hevur røddin í hinum endanum sagt, at viðkomandi ætlaði at tosa við ein politist.
- Tú tosar við ein politist, hevur Kristina tá svarað.
Í samrøðuni greiðir Kristina Christiansen frá, hvussu ein tilvildarlig viðmerking í sjónvarpinum fyri 35 árum síðani, gav henni eitt eyðknevni, sum framvegis hongur við.
Hóast Kristina Christiansen nú er givin í politinum, fer hon neyvan at keða seg.
Hon spælir fótbólt, gongur túrar, er til fitness av og á, er leiðari hjá B36-kvinnum, spælir sjónleik, er omma, hevur hús og summarhús og so hevur hon eisini tikið koyrikort til hýruvogn.