Nú felagið aftur er í bestu deildini, er neyðugt at styrkja fíggjarliga partin hjá B68. Ein liður í hesum er bilafestivalurin, ið verður á á Svangaskarði um vikuskifti.

Umleið 150 bilar eru á økinum, og stórt tjald er sett upp. Hetta verður alt karmur um ein fjøllbroyttan bilafestival.

Umframt at flest allar bilasølur í Føroyum eru umboðaðar, verður eisini pallborðskjak. Kjakast verður um el-bilar mótvegis vanligum bilum.

Um hetta eydnast væl, verður bilafestivalurin á Svangaskarði eitt árligt tiltak, siga Petur Gaardlykke, varaformaður og Ian Jacobsen, nevndarlimur í B68.

Bilafestivalurin er leygardagin og sunnudagin. Báðar dagar frá klokkan 14 til 20. Tað er ókeypis atgongd.