- Tíðindi, mentan og ítróttur
Brunsj
Vígdis Sigmundsdóttir er fødd á Tvøroyri, men flutti til havnar við foreldrunum Sigmund Petersen og Herborg í Búri sum fimm ára gomul.
Umframt at velja sangirnar í sendingini greiðir Vígdis frá síni lívsleið. Vit hoyra um familjuna og barnaárini undir krígnum í Havn og Skopun, ungdómsárini á háskúla, húsholdningskúla og seinni sjúkrarøktarfrøðingarskúla í Danmark.
Aftaná lokna útbúgving sum sjúkrarøktarfrøðingur í Randers fekk Vígdis starv á operationsdeildini í Randers Central Sygehus. Tað var í hesum tíðarskeiði, at hon møtti sínum lívs kærleika, Ole Munksgaard-Nielsen, og saman bygdu tey "Bakkehuset" uttanfyri Randers. Har búleikaðust tey saman við tvillingasynum teirra og fleiri ymiskum húsdjórum, líka til Ole gjørdist sjúkur og doyði í 1983.
Tá flutti Vígdis aftur til Føroyar og fekk eitt nýupprættað starv sum innkeypari á Landsjúkrahúsinum. Hon innførdi nýggjar hættir at forsýna tær ymisku deildirnar og arbeiddi á LSH í 16 ár, til hon fór frá vegna aldur í 1997.
Vígdis er eisini útbugvin inandura arkitekt, men best kend sum myndlistakvinna innan myndklipp.
Hóast hon er vorðin 86 ár er Vígdis Sigmundsdóttir enn virkin myndlistakvinna, og fyri tíðina er hon við á framsýning í Salt á Tvøroyri.
Vígdis hevur eisini eina heimasíðu, har fleiri av hennara verkum kunnu síggjast: www.sigmundsdottir.dk