- Tíðindi, mentan og ítróttur
Breddin
Fyri viku síðani legði Heri á Rógvi fram temafrágreiðing hja Búskaparráðnum um starvsfólkatørvin næstu 10 árini á vælferðarøkinum. Niðurstøðan er greið - stórar avbjóðingar eru á eldra-, heilsu- og barnamenningarøkinum. Vit tosa við Hera á Rógvi um tørvin á dagstovnaøkinum.
Í dag er júst ein vika síðani, at Asta í Toft segði upp sum leiðari fyri Miðstovnin í Gamla Realskúlanum í Havn. Gjøgnum síni 24 ár sum leiðari fyri stovnin hevur Asta upplivað mangt og hvat. Hon hevur upplivað vøkstur og menning á dagstovnaøkinum - og hon hevur upplivað skerjingar og sparingar.
Eftir hennara tykki er farið at ganga skeiva vegin - útbúnu námsfrøðingarnir á stovninum gerast alsamt færri. Viðhvørt eru starvsfólkini so fá til arbeiðis, at neyðugt er biðja foreldrini koma eftir børnunum mitt á degi. Vit hava eina longri samrøðu við Astu í Toft um arbeiðið og avbjóðingarnar á hennara nú fyrrverandi arbeiðsplássi.
Sum foreldur er Bergdis Gisladóttir ørkymlað av støðuni á dagstovnaøkinum. Hon umboðar ein stóran og vaksandi skara av foreldrum, sum eftirlýsa fleiri starvsfólk at taka sær av børnunum. Vit tosa við Bergdís Gisladóttir, sum er ein av stigtakarunum til facebookbólk við útvið 800 limum, ið ynskja broytingar og ábøtur á økinum.
Eisini tosa vit við Jógvan Philbrow, formann í Føroya Pedagogfelag, um avbjóðingarnar á dagstovnaøkinum. Síðst í sendingini er Jóan Petur Hentze, trivnaðarstjóri í Tórshavnar Kommunu, gestur á Breddanum.
Lagt til rættis: Arnfríð Joensen Dahl, Jógvan Skeel Nolsøe og Jón Brian Hvidtfeldt
Redaktørur: Jón Brian Hvidtfeldt