Fyrr í tíðini var mangan hættisligt at vera kvinna, tí tú kundi verða skírd heks, gívur, gandakelling, groyggj, gandakona, gandahít, trøllkona ella trøllkelling.

Sára Malena Guttormsdatter í Skúgvi segðist duga gand, og søgurnar um hana vóru mangar. Sólrun Michelsen hevur bygt sína skaldsøgu á søgnina um hana.

Marna Jacobsen og Eilen Anthoniussen, sum ummæla skaldsøguna, fingu væl burtur úr henni. Marna kendi søgnina um Sáru Malenu frammanundan, og við skaldsøguni gjørdist hon meira livandi.
Eilen frætti á fyrsta sinni um Sáru Malenu við nýggju skaldsøguni, og tað var ein spennandi uppliving.