Fólk búgva nú aftur í Múla

Eftir at fólk ikki hava búð í Múla síðani fyrst í 1990-árunum, eru hjúnini Laila og Niklas í Garðinum flutt úr Klaksvíkar kommunu til Hvannasunds kommunu – og orsøkin er, at tey eru flutt til Múla nú tey hava selt sethúsini í Klaksvík og bíða eftir at nýggja íbúðin, ið tey hava keypt, ætlandi verður liðug um ársskiftið.

Okkum dámar væl her norðuri, her er vakurt, nógv fugalív og tað er næstan ikki dagur, at vit ikki síggja onkra haru. Tað einasta, ið er at finnast at, er at vegurin er so vánaligur. Og tí tekur tað eina drúgva løtu at koyra teir umleið 7 kilometrarnar til Múla, siga tey bæði.

Tað eru bara tey, sum hava tilknýti til Múla, ið hava loyvi til at koyra inn í bygdina og hetta virða fólk yvirhøvir, siga Laila og Niklas. Annars eru tað fitt av fólki, ið vitja í Múla, samstundis sum tú ofta sært nógvar bilar á gamla Viðareiðisvegnum, tá sólin setur.

Í summar verður eisini ein stór veitsla hildin í bygdini. Talan er um eitt gullbrúdleyp, ið bæði Laila og Niklas gleða seg til.

Tú kanst hoyra alla samrøðuna við Lailu og Niklas í Garðinum her!